1. gr.

Reglur þessar gilda um rafeyrisfyrirtæki sem fengið hafa starfsleyfi til að gefa út rafeyri skv. III. kafla laga um útgáfu og meðferð rafeyris, nr. 17/2013.

2. gr.

Rafeyrisfyrirtæki skal varðveita með tryggilegum hætti þá fjármuni sem mótteknir hafa verið í skiptum fyrir rafeyri. Fjármunir teljast tryggilega varðveittir ef þeir eru geymdir á innlánsreikningi hjá fjármálafyrirtæki eða ef fjárfest er með þeim í öruggum, seljanlegum og áhættulitlum eignum, sbr. 4. gr. þessara reglna.

Fjármunir sem rafeyrisfyrirtæki veitir viðtöku í formi greiðslu með greiðslumiðli skulu varðveittir í samræmi við 1. mgr. frá þeim tíma sem þeir eru lagðir inn á greiðslureikning rafeyrisfyrirtækisins, eða þeir eru aðgengilegir því til ráðstöfunar í samræmi við ákvæði laga um greiðsluþjónustu um framkvæmdartíma, og í síðasta lagi innan fimm viðskipta­daga, í skilningi laga um greiðsluþjónustu, frá útgáfu rafeyris. Hvað sem öðru líður skulu slíkir fjármunir varðveittir tryggilega eigi síðar en fimm viðskiptadögum síðar, eins og þeir eru skilgreindir í 29. tölul. 8. gr. laga um greiðsluþjónustu, eftir útgáfu rafeyris.

3. gr.

Fjármuni sem rafeyrisfyrirtæki varðveitir skv. 2. gr. skal fyrirtækið halda skýrt að­greind­um frá eigin fé sínu.

Fjármunir sem rafeyrisfyrirtæki varðveitir skv. 2. gr. skulu teljast sértökukröfur í þrotabú rafeyrisfyrirtækis komi til gjaldþrots. Um rétthæð þeirra fer skv. 109. gr. laga nr. 21/1991, um gjaldþrotaskipti o.fl., enda sýni eigandi fjármuna fram á eignarrétt sinn að þeim.

4. gr.

Fjármunir skv. 1. mgr. 3. gr. skulu lagðir inn á sérmerktan reikning, eða eftir atvikum sér­merkta reikninga, hjá fjármálafyrirtæki eða þeim varið í öruggar, seljanlegar og áhættu­litlar eignir.

Með öruggum, seljanlegum og áhættulitlum eignum skv. 1. mgr. er átt við:

1. lausafjáreignir sem falla undir stig 1, skv. reglum Seðlabanka Íslands um lausa­fjárhlutfall eða
2. eignaliði sem falla undir einn af flokkunum sem settir eru fram í töflu 1 í 14. lið í viðauka I við tilskipun Evrópuþingsins og ráðsins 2006/49/EB, sbr. 55. gr. B reglna um eiginfjárkröfur og áhættugrunn fjármálafyrirtækja, nr. 215/2007, þar sem gjald fyrir tiltekið áhættufjármagn er 1,6% að hámarki, að undanskildum öðrum fullgildum liðum eins og þeir eru skilgreindir í 15. lið þess viðauka.

Til öruggra, seljanlegra og áhættulítilla eigna skv. 1. mgr. teljast einnig fjárfestingar í verðbréfasjóðum (UCITS), sem fjárfesta eingöngu í eignum sem tilgreindar eru í 2. mgr. þessarar greinar. Ef fjárfest er í verðbréfasjóðum (UCITS) skal þó bæta við 10% trygg­ingarálagi.

5. gr.

Rafeyrisfyrirtæki sem hefur heimild til að veita greiðsluþjónustu samkvæmt lögum um greiðsluþjónustu, sbr. a-lið 1. mgr. 24. gr. laga um útgáfu og meðferð rafeyris, nr. 17/2013, skal halda fjármunum, sem mótteknir hafa verið frá notendum greiðsluþjónustu eða frá öðrum greiðsluþjónustuveitendum vegna framkvæmdar greiðslu, skýrt að­greind­um frá eigin fé rafeyrisfyrirtækisins, og fjármunum í eigu annarra en notenda greiðslu­þjónustu.

Rafeyrisfyrirtæki sem hefur heimild til að veita greiðsluþjónustu, skv. 1. mgr., skal einnig varðveita fjármuni vegna þeirrar þjónustu með tryggum hætti og í samræmi við reglur um tryggilega varðveislu fjármuna greiðslustofnana.

6. gr.

Rafeyrisfyrirtæki skulu tilkynna Fjármálaeftirlitinu um ráðstafanir til varðveislu fjármuna skv. 4. gr. reglnanna. Breytingar á þeim ráðstöfunum t.d. úr innlánsreikningum, í fjár­festingar lausafjáreigna eða verðbréfasjóða, sem og breytingar á innbyrðis vægi, skulu tilkynntar fyrirfram til Fjármálaeftirlitsins.

7. gr.

Rafeyrisfyrirtæki skal fyrir lok aprílmánaðar ár hvert senda Fjármálaeftirlitinu, á þar til gerðu eyðublaði, sem Fjármálaeftirlitið lætur í té, yfirlýsingu, staðfesta af löggiltum endur­skoðanda, um stöðu sérmerkts reiknings í banka þann 31. desember á liðnu ári. Í yfir­lýsingunni skulu, eftir atvikum, koma fram upplýsingar um heildarvirði öruggra, seljan­legra og áhættulítilla eigna sem fjárfest er í á grundvelli 4. gr.

Samtala tryggilega varðveittra fjármuna skv. 4. gr. skal ekki vera lægri en staða fjár­muna í vörslu rafeyrisfyrirtækis samkvæmt bókhaldi fyrirtækisins.

8. gr.

Með reglum þessum eru tekin upp ákvæði 7. gr. tilskipunar Evrópuþingsins og ráðsins 2009/110/EB, um stofnun og rekstur rafeyrisfyrirtækja og varfærniseftirlit með þeim. Reglur þessar sem settar eru með heimild í 6. mgr. 25. gr. laga um útgáfu og meðferð rafeyris, nr. 17/2013, öðlast gildi þremur mánuðum eftir birtingu þeirra.