1. gr.

Meginmarkmið fræðasviðsins er að bjóða upp á háskólanám og standa fyrir rannsóknum í hug- og félagsvísindum, þar með talið félagsvísindum, lögfræði og menntunarfræðum. Fræðasviðið mótar sér stefnu til nokkurra ára í senn í samræmi við grunnmarkmið sín og stefnu Háskólans á Akureyri hverju sinni. Stefna hug- og félagsvísindasviðs árin 2008-2011 byggist á stefnu og framtíðarsýn þeirra deilda sem runnu saman í eina við stofnun hug- og félagsvísindadeildar 1. ágúst 2008, þ.e. kennaradeildar og félagsvísinda- og lagadeildar.

Hug- og félagsvísindasvið starfar á grundvelli laga um háskóla nr. 63/2006, laga um opinbera háskóla nr. 85/2008 og reglna fyrir Háskólann á Akureyri nr. 387/2009.

2. gr.

Deildafundur hug- og félagsvísindasviðs, öðru nafni fræðasviðsfundur, fer með æðsta ákvörðunarvald í málefnum fræðasviðsins. Hann fjallar um meginatriði í starfsemi fræðasviðsins og ber ásamt forseta ábyrgð á að starfsemi þess sé í samræmi við lög og reglur. Fræðasviðsfundur gerir tillögu að ráðningu forseta fræðasviðsins, að undangenginni kosningu um umsækjendur. Á fræðasviðsfundi skal jafnframt kosinn staðgengill forseta til tveggja ára sem og varastaðgengill. Nánar er kveðið á um verkefni deildafundar fræðasviðs í 16. gr. reglna fyrir Háskólann á Akureyri nr. 387/2009.

Á fræðasviðsfundi eiga sæti og atkvæðisrétt: Forseti, prófessorar, dósentar, lektorar og aðjúnktar óháð starfshlutfalli, sérfræðingar og forstöðumaður skólaþróunarsviðs, einn fulltrúi stundakennara úr hverri deild, tilnefndur af stundakennurum viðkomandi deildar til eins árs í senn og einn fulltrúi nemenda úr hverri deild, tilnefndur af félagssamtökum þeirra til eins árs í senn.

3. gr.

Deildaráð starfar skv. 17. gr. reglna fyrir Háskólann á Akureyri nr. 387/2009. Ráðið fjallar um erindi sem varða mál einstakra nemenda og önnur málefni sem varða fræðasviðið. Fræðasviðsfundur setur nánari reglur um vald og verksvið deildaráðs.

Í deildaráði eiga sæti auk forseta fræðasviðs staðgengill hans, deildarformenn, brautarstjórar, forstöðumaður skólaþróunarsviðs, einn fulltrúi kennara valinn af deildafundi til tveggja ára í senn og einn fulltrúi nemenda valinn af félagssamtökum þeirra til eins árs í senn.

4. gr.

Forseti hug- og félagsvísindasviðs er ráðinn af rektor til tveggja ára að fenginni umsögn fræðasviðsins, skv. 15. gr. reglna fyrir Háskólann á Akureyri nr. 387/2009. Um verkefni forseta er fjallað í 14. gr. sömu reglna. Forseti annast fundarboð til fulltrúa á fræðasviðsfundi og fundastjórnun á þeim. Hann er jafnframt formaður deildaráðs.

5. gr.

Hug- og félagsvísindasvið skiptist í þrjár deildir: Félagsvísindadeild, kennaradeild og lagadeild¹. Undir fræðasviðið fellur skólaþróunarsvið Háskólans á Akureyri².

Hver deild ber ábyrgð á skipulagi og þróun þess náms sem fræðasviðið hefur samþykkt að fari fram innan deildarinnar. Innan hverrar deildar er boðið upp á minnst eina námsbraut, en með því er átt við skilgreinda samsetningu námskeiða sem nemandinn þarf að ljúka til að hljóta skilgreinda gráðu.

Við skipulag náms í sálfræði er m.a. tekið mið af lögum um sálfræðinga nr. 40/1976.

Við skipulag kennaranáms er m.a. tekið mið af lögum um menntun og ráðningu kennara og skólastjórnenda við leikskóla, grunnskóla og framhaldsskóla nr. 87/2008, lögum um leikskóla nr. 90/2008, lögum um grunnskóla nr. 91/2008, lögum um framhaldsskóla nr. 92/2008 og viðkomandi reglugerðum.

Við skipulag náms í lögfræði er m.a. tekið mið af lögum um lögmenn nr. 77/1998 og reglugerð um próf til að öðlast réttindi til að vera héraðsdómslögmaður nr. 1095/2005.
 ______________

¹Sbr. samþykkt háskólaráðs frá 28. september 2007. Í samþykktinni var stefnt að því að sjálfstæð hugvísindaskor (-deild samkvæmt núgildandi reglum) tæki til starfa haustið 2009. Ljóst er að þessu markmiði verður ekki náð, en á fræðasviðinu verður áfram stefnt að stofnun sjálfstæðrar hugvísindadeildar.

² Heimild til þess að starfrækja sérstakar háskólastofnanir við deildir eða skóla er gefin í c-lið 1. mgr. 4. gr. laga nr. 85/2008 og 3. mgr. 11. gr. sömu laga.

6. gr.

Viðfangsefni skólaþróunarsviðs lúta að ráðgjöf við kennara og skólastjóra leik- og grunnskóla og hvers konar þróunar- og umbótastarfi í skólum. Það hefur forgöngu um að kynna kennurum nýjungar á sviði skóla- og kennslumála, stendur fyrir rannsóknum á skólastarfi og fræðslu til starfandi kennara og heldur ráðstefnur.

Fagleg ábyrgð á starfsemi skólaþróunarsviðs er á hendi forstöðumanns, sem ráðinn er af rektor eftir tillögu deildafundar. Forstöðumaður skal hafa hlotið hæfnisdóm sem lektor, dósent eða prófessor á fræðasviði sem tengist starfsemi skólaþróunarsviðs.

Á skólaþróunarsviði starfa sérfræðingar í menntavísindum. Þeir sinna ráðgjöf, þróunarverkefnum í skólum, námskeiða- og ráðstefnuhaldi, þjónusturannsóknum (án rannsóknafrelsis) og akademískum rannsóknum (með rannsóknafrelsi). Þeir geta sinnt kennslu við Háskólann á Akureyri og skal um það samið í hverju tilviki við forstöðumann skólaþróunarsviðs að höfðu samráði við viðkomandi sérfræðing. Á sama hátt geta kennarar við HA átt samstarf við skólaþróunarsvið vegna rannsóknar- og þróunarverkefna.

7. gr.

Deildarformenn og deildarfundir bera ábyrgð á kennslu, kennslufyrirkomulagi og þróun náms. Deildarfundur gerir einnig tillögur til forseta um að auglýsa stöður, fjallar um umsóknir að fengnu dómnefndaráliti og gerir tillögur til forseta um ráðningar.

Sæti í deild – og þar með seturétt, tillögurétt og atkvæðisrétt á deildarfundum – eiga aðjúnktar, lektorar, dósentar og prófessorar sem inna af hendi minnst 50% kennsluskyldu sinnar innan deildar og einn fulltrúi nemenda sem valinn er af félagssamtökum þeirra til eins árs í senn. Deildarformaður skal kosinn af deildarfundi til tveggja ára í senn, úr hópi fastráðinna lektora, dósenta og prófessora deildarinnar. Einnig skal deildarfundur kjósa staðgengil deildarformanns til sama tíma. Einungis fræðasviðsfundur getur leyft frávik frá þessum ákvæðum.

Deildarformaður ber ábyrgð á starfsemi deildar, skipulagi, undirbúningi og framkvæmd náms, þróun og samskiptum og tekur einnig þátt í stjórn fræðasviðsins, m.a. með setu í deildaráði. Hann sér um samskipti við nemendur, áætlun kennslumagns, gerir tillögur um nýráðningar, velur umsjónarkennara hvers námskeiðs í samráði við forseta fræðasviðs og kemur að stundaskrárgerð í samvinnu við skrifstofu fræðasviðs. Deildarformaður stýrir deildarfundum og fylgir samþykktum fundanna eftir. Nánar er kveðið á um ábyrgð og verkefni deildarformanns í sérstakri starfslýsingu.

8. gr.

Deildum er heimilt (en ekki skylt) að velja sérstaka brautarstjóra til að hafa umsjón með einni eða fleiri námsbrautum innan deildarinnar. Brautarstjórar eru kosnir á deildarfundi til eins árs í senn.

Brautarstjórn felur í sér samskipti við nemendur, setu í náms- og matsnefnd og forystu um samráð milli kennara um kennslu- og námsþróun. Nánar er kveðið á um ábyrgð og verkefni brautarstjóra í sérstakri starfslýsingu.

Kennarafundir eru vettvangur slíks samráðs og boðar brautarstjóri til slíkra funda eftir þörfum. Á kennarafund má kalla fastráðna kennara, lausráðna kennara, stundakennara og hverja þá aðra sem koma að kennslu innan námsbrautar hverju sinni.

9. gr.

Náms- og matsnefndir gera tillögur um mat á fyrra námi og fyrirhuguðu skiptinámi nemenda í viðkomandi deild eða á námsbraut. Náms- og matsnefndir gera jafnframt tillögur til deildarfundar um breytingar á náms- og kennsluskrá. Náms- og matsnefnd skal skipuð minnst þremur fulltrúum kennara (aðjúnkta, lektora, dósenta eða prófessora), sem valdir skulu til tveggja ára í senn af viðkomandi deildarfundi og einum fulltrúa nemenda, sem er valinn af félagssamtökum þeirra til eins árs í senn. Nefndin skiptir sjálf með sér verkum. Nánar er kveðið á um skipan, hlutverk og verkferla náms- og matsnefnda í sérstakri samþykkt.

Náms- og matsnefndir á hug- og félagsvísindasviði eru fimm: Í (1) lögfræði, (2) hugvísindum, (3) félagsvísindum, (4) grunnnámi í menntunar- og kennslufræðum og (5) framhaldsnámi í menntunar- og kennslufræðum. Námsnefndirnar skulu hafa formlegt samráð sín á milli með það fyrir augum að koma á sem mestri samvinnu um nám og námsframboð á fræðasviðinu. Stefnt skal að því að sameina náms- og matsnefndir (4) og (5) þegar heildstætt fimm ára kennaranám verður komið að fullu til framkvæmda.

10. gr.

Umsjónarmenn málaflokka bera sérstaka ábyrgð á tilteknum málaflokkum innan fræðasviðsins. Málaflokkar sem geta haft slíka umsjónarmenn eru til dæmis rannsóknir, alþjóðasamskipti, kynningarmál og frágangur náms- og kennsluskrár. Umsjónarmenn málaflokka eru kosnir á fræðasviðsfundi til tveggja ára í senn.

11. gr.

Stjórnskipulag þetta er samþykkt á grundvelli laga nr. 85/2008 um opinbera háskóla og reglna fyrir Háskólann á Akureyri nr. 387/2009 og tekur gildi frá og með 1. ágúst 2009.

Stjórnskipulag þetta og starfslýsingar skal endurskoðað reglulega og skal þá tekið mið af fenginni reynslu. Næsta endurskoðun skal gerð á fyrsta fræðasviðsfundi almanaksársins 2010.

Þorsteinn Gunnarsson rektor.