Um skráningarskyldu. 1. gr. Sóttvarnalæknir er ábyrgur fyrir því að haldin sé sjúkdómaskrá sem tekur til smitsjúkdóma, sjúkdómsvalda þeirra, sjúkdóma af völdum eiturefna og geislavirkra efna, óvenjulegra og óvæntra atburða sem geta haft alvarlegar heilsufarslegar afleiðingar meðal þjóða heims, sýklalyfjanotkunar og bólusetninga (ónæmisaðgerða) sbr. reglugerð um bólusetningar nr. 221/2001. Sóttvarnalæknir skal fá afhentar upplýsingar úr lyfjagagnagrunni landlæknis skv. 27. gr. lyfjalaga og frá heilbrigðisstofnunum til að halda skrá um sýklalyfjanotkun. Upplýsingarnar skulu vera ópersónugreinanlegar. Til að halda skrá um sýklalyfjanotkun kallar sóttvarnalæknir eftir upplýsingum úr lyfjagagnagrunni landlæknis og frá sjúkrastofnunum. Þær upplýsingar mega ekki bera með sér önnur persónuauðkenni en aldur, kyn og búsetu samkvæmt póstnúmeri þeirra sem lyfjunum hefur verið ávísað á, sérgrein læknis, sjúkrastofnun og deild þar sem sjúkrastofnun er deildaskipt. Upplýsingar um sýklalyfjanotkun skulu vera ópersónugreinanlegar. Forstöðumönnum heilbrigðisstofnana er skylt að senda sóttvarnalækni upplýsingar um magn sýklalyfja sem notað er á viðkomandi stofnun, skipt eftir deildum þar sem það á við. Gæta skal fyllsta trúnaðar um allar einkalífsupplýsingar sem fram koma í smitsjúkdómaskrá og gilda um skrána sömu reglur og aðrar sjúkraskrár. Ítrustu varúðar skal gætt við meðferð, vörslu og sendingu upplýsinga um tilkynningaskylda sjúkdóma. Sóttvarnalæknir gefur nánari fyrirmæli um tilhögun skráningar og tilkynninga í smitsjúkdómaskrá og skrá um sýklalyfjanotkun, m.a. um hvaða ráðstafanir skuli viðhafðar til að tryggja öryggi persónuupplýsinga varðandi tilkynningaskylda sjúkdóma. 2. gr. Þeir sjúkdómar, sjúkdómsvaldar og atburðir sem sóttvarnalög fjalla um eru skráningarskyldir og geti þeir ógnað almannaheill eru þeir jafnframt tilkynningaskyldir. Með skráningarskyldu er átt við skyldu til að senda sóttvarnalækni ópersónugreindar upplýsingar en með tilkynningaskyldu er átt við skyldu til að senda persónugreindar upplýsingar um sjúkdómstilvik. 3. gr. Læknum er skylt að skrá upplýsingar um skráningar- og tilkynningarskylda sjúkdóma á þar til gerð eyðublöð eða með rafrænum hætti samkvæmt nánari fyrirmælum sóttvarnalæknis sbr. 1. gr. Sama gildir um forstöðumenn rannsóknastofa, sjúkradeilda og annarra heilbrigðisstofnana. Skrá um smitsjúkdóma skal senda sóttvarnalækni mánaðarlega eða oftar ef hann telur þörf á því. Læknum og hjúkrunarfræðingum er skylt að skrá í sjúkraskrá, samkvæmt nánari fyrirmælum sóttvarnalæknis sbr. 1. gr., allar bólusetningar sem þeir framkvæma. Læknar tilkynna sóttvarnalækni um bólusetningar sem gerðar hafa verið. 4. gr. Skráningarskyldir sjúkdómar. Skráningarskyldir sjúkdómar eru: afbrigðilegar berklasýkingar bráður niðurgangur eyrnabólga flatlús hálsbólga heilabólga (encephalitis/meningoencephalitis) heilahimnubólga af völdum sýkla heilahimnubólga af óþekktum toga hlaupabóla höfuðlús inflúensa kláðamaur kynfæravörtur (condyloma genitalis) lungnabólga Lyme sjúkdómur (borreliosis) malaría matareitrun af völdum sýkla eða eiturefna þeirra njálgur psittacosis ristill (herpes zoster) skarlatssótt sýkingar af völdum fjölónæmra sýkla aðgerðatengdar sýkingar í heilbrigðisþjónustunni toxóplasmasýking þvagrásarbólga af óþekktri orsök. 5. gr. Tilkynningaskyldir sjúkdómar, sjúkdómsvaldar þeirra og atburðir sem ógna heilsu manna. Tilkynningaskyldir sjúkdómar eru: barnaveiki berklar bólusótt bótúlismi bráð sjúkdómseinkenni af völdum eiturefna og geislavirkra efna Córónaveirulungnabólga (SARS/heilkenni alvarlegrar bráðrar lungnabólgu - HABL) Creutzfeldt Jacob veiki og afbrigði hennar enteróhemórrhagísk E. coli sýking giardiasis gulusótt og aðrar blæðandi veiruhitasóttir hemophilus influenzea, sjúkdómur gerð b hettusótt hérasótt (tularemia) HIV-sýking holdsveiki hundaæði huldusótt (Q-fever) inflúensa A sem valdið getur heimsfaraldri kampýlóbaktersýking kikhósti klamýdíusýking kólera legíónellusýking lekandi lifrarbólga A lifrarbólga B lifrarbólga C lifrarbólga E lifrarbólga vegna annarra veira linsæri listeríusýking lömunarveiki meningókokkasjúkdómur meticillín ónæmur staphylokoccus aureus (MÓSA) miltisbrandur mislingar óvæntir atburðir sem ógnað geta heilsu manna (óvænt aukning sjúkdómstilvika eða dauðsfalla) pneumókokkasýkingar í blóði, lið, beini og heilahimnu rauðir hundar salmonellusýking sárasótt shígellusýking stífkrampi svarti dauði vanómýcín ónæmir enterókokkar öldusótt (brucellosis). 6. gr. Tilkynningu um tilkynningaskyldan sjúkdóm, sjúkdómsvald eða óvænta atburði sem ógnað geta heilsu manna skal senda sóttvarnalækni án tafar eða samkvæmt nánari fyrirmælum hans. Sóttvarnalækni er heimilt að fela göngudeildum smitsjúkdóma og rannsóknarstofum, sbr. 1.-4. gr. reglugerðar nr. 414/2007 um að halda skrá yfir tilkynningaskyld sjúkdómstilfelli og sjúkdómsvalda. Á eyðublaði skal m.a. koma fram: - Heiti sjúkdóms eða sjúkdómsvalds og greiningarnúmer samkvæmt alþjóðlegu sjúkdóma- og dánarmeinaskránni sem er gildandi.
- Hvenær, hvernig og hvaða sjúkdómsgreining eða greining sjúkdómsvalds var staðfest.
- Persónuauðkenni og kyn hins sýkta.
- Í hvaða sóttvarnaumdæmi hinn sýkti býr, dvalarstaður.
- Nafn tilkynnanda, læknisnúmer, vinnustaður, undirskrift og dagsetning tilkynningar.
7. gr. Bólusetningar eru tilkynningaskyldar, skv. reglugerð nr. 221/2001. Gildistaka. 8. gr. Reglugerð þessi, sem sett er með stoð í 18. gr., sbr. 3. gr., sóttvarnalaga nr. 19/1997, öðlast þegar gildi. Jafnframt fellur úr gildi reglugerð nr. 129/1999 með síðari breytingum. Heilbrigðisráðuneytinu, 18. apríl 2008. Guðlaugur Þór Þórðarson. Berglind Ásgeirsdóttir. |