1. gr.

Gjaldskráin tekur til hjúkrunarþjónustu við sjúkratryggða heimilismenn hjúkrunarrýma á vegum öldrunarstofnana sem ekki eru á föstum fjárlögum árið 2015 og eru án samnings við Sjúkratryggingar Íslands um verðlagningu þjónustunnar. Í henni er kveðið á um þátttöku í kostnaði sjúkratryggðra í formi daggjalda fyrir hjúkrun til viðbótar daggjaldi samkvæmt reglugerð nr. 1185/2014 um daggjöld fyrir dvalarrými, dagdvalarrými og hjúkrunarrými sem ekki eru á föstum fjárlögum árið 2015.

2. gr.

Heimilismenn hjúkrunarrýma eru sjúkratryggðir einstaklingar sem færni- og heilsumats­nefnd hefur metið að séu í þörf fyrir dvöl í hjúkrunarrými samkvæmt reglugerð nr. 466/2012 um færni og heilsumat vegna dvalar- og hjúkrunarrýma. Sjúkratryggingar Íslands ákvarða hvort einstaklingur telst sjúkratryggður, sbr. 4. mgr. 10. gr. laga nr. 112/2008 um sjúkratryggingar.

3. gr.

Daggjöld fyrir hjúkrunarþjónustu miðast við tilgreindan hámarksfjölda hjúkrunarrýma og skulu vera sem hér segir frá 1. janúar 2015:

Nánari lýsing, sbr. töflu:

Heimilt er að fækka hámarksfjölda hjúkrunarrýma sem greiðsluþátttaka sjúkratrygginga miðast við og skal þá tilkynna viðkomandi stofnun það með þriggja mánaða fyrirvara, miðað við mánaðamót.

Miðað er við að daggjöldin séu fyrirframgreidd mánaðarlega á grundvelli áætlaðrar nýtingar hjúkrunarrýmanna sem tilgreind eru í framangreindu yfirliti og að endanlegt uppgjör eigi sér stað eftir hvern almanaksmánuð. Greiðsluþátttaka sjúkratrygginga er þó aldrei hærri en sem samsvarar 100% nýtingu tilgreindra rýma í uppgjörsmánuðinum og 98,6% nýtingu rýmanna á tólf mánaða tímabili.

Daggjald skal greitt þrátt fyrir að heimilismaður hverfi af stofnun í stuttan tíma, svo sem til aðstandenda yfir helgi eða hátíðar, enda hafi heilbrigðisyfirvöld ekki aukakostnað af dvöl­inni.

Fari heimilismaður á sjúkrahús til skammtímainnlagnar skal greiða 70% af daggjaldi stofn­unar í allt að 45 daga.

Við andlát heimilismanns eða þegar heimilismaður flytur fyrir fullt og allt af stofnun skal greiða fullt daggjald í allt að sjö daga. Ef heimilismaður í hvíldarrými andast skal greiða fullt daggjald í allt að tvo daga.

4. gr.

Innifalin í daggjöldum samkvæmt gjaldskrá þessari er hvers konar þjónusta sem heim­ilis­mönnum er látin í té á stofnunum umfram það sem kveðið er á um í reglugerð nr. 1185/2014 um daggjöld fyrir dvalarrými, dagdvalarrými og hjúkrunarrými sem ekki eru á föstum fjárlögum árið 2015, sbr. meðal annars reglugerð nr. 427/2013, um greiðslur öldrunar­stofnana fyrir heilbrigðisþjónustu.

5. gr.

Um greiðslur fyrir veitta þjónustu og þátttöku heimilismanns í greiðslu dvalarkostnaðar fer samkvæmt 21., 22., 23. og 26. gr. laga nr. 125/1999, um málefni aldraðra, með síðari breyt­ingum, og 6. mgr. 48. gr. laga nr. 100/2007, um almannatryggingar, með síðari breyt­ingum.

6. gr.

Gjaldskrá þessi, sem sett er með stoð í 38. gr. laga nr. 112/2008, um sjúkratryggingar, með síðari breytingum, reglugerð nr. 1184/2014 um greiðslu kostnaðar vegna heil­brigðis­þjónustu í hjúkrunarrýmum öldrunarstofnana sem eru án samnings við Sjúkra­trygg­ingar Íslands, og reglugerð nr. 1185/2014 um daggjöld fyrir dvalarrými, dag­dvalar­rými og hjúkrunarrými sem ekki eru á föstum fjárlögum árið 2015. Gjaldskráin gildir frá 1. janúar 2015 til og með 31. maí 2015.