I. KAFLI Almenn ákvæði. 1. gr. Markmið. Markmið reglugerðar þessarar er að auka kröfur um öryggi og bæta starfrækslu flugstjórnarþjónustu með samræmdum kröfum um skírteini flugumferðarstjóra. 2. gr. Gildissvið. Reglugerð þessi gildir um skírteini nema í flugumferðarstjórn og flugumferðarstjóra sem sinna verkefnum sínum á ábyrgð veitanda flugleiðsöguþjónustu. Reglugerð þessari til nánari fyllingar gilda ákvæði í reglugerð um skírteini útgefin af Flugmálastjórn Íslands nr. 400/2008. 3. gr. Lögbært yfirvald og framkvæmd. Samgöngustofa telst lögbært yfirvald samkvæmt reglugerð þessari og sér um framkvæmd hennar. II. KAFLI Undanþágur frá ákvæðum reglugerðar (ESB) nr. 805/2011, sbr. 31. gr. hennar. 4. gr. Viðbótaráritun fyrir úthafsstjórnun (OCN) skal fylgja áritun fyrir huglæga svæðisstjórnun án kögunarbúnaðar (ACP) sé handhafa áritunarinnar ætlað að veita huglæga svæðisstjórnun án kögunarbúnaðar í úthafsstjórnunarsvæði. 5. gr. Skírteinishafa er eigi rétt að starfa sem flugumferðarstjóri eftir að hann hefur náð 60 ára aldri. Heimilt er þó að framlengja þennan hámarksaldur um allt að 3 ár. III. KAFLI Heilbrigðiskröfur. 6. gr. Umsækjendur um skírteini flugumferðarstjóranema eða skírteini flugumferðarstjóra skulu vera handhafar 3. flokks heilbrigðisvottorðs og uppfylla þær heilbrigðiskröfur sem fram koma í viðauka við reglugerð þessa. IV. KAFLI Lokaákvæði. 7. gr. Innleiðing. Með reglugerð þessari öðlast gildi hér á landi reglugerð framkvæmdastjórnarinnar (ESB) nr. 805/2011 frá 10. ágúst 2011 um ítarlegar reglur um skírteini flugumferðarstjóra og tiltekin vottorð og heimildir samkvæmt reglugerð Evrópuþingsins og ráðsins (EB) nr. 216/2008, með þeim breytingum og viðbótum sem leiða af XIII. viðauka EES-samningsins, bókun 1 um altæka aðlögun og öðrum ákvæðum hans, samkvæmt ákvörðun sameiginlegu EES-nefndarinnar nr. 127/2013 frá 14. júlí 2013. Reglugerðin er birt í EES-viðbæti við Stjórnartíðindi Evrópusambandsins nr. 37 frá 27. júní 2013, bls. 162. 8. gr. Refsiákvæði. Brot gegn ákvæðum reglugerðar þessarar varða refsingu samkvæmt 141. gr. laga um loftferðir nr. 60/1998 með síðari breytingum. 9. gr. Viðauki. Viðauki sem fylgir reglugerð þessari skal vera hluti hennar. 10. gr. Gildistaka. Reglugerð þessi er sett samkvæmt heimild í 57. gr. a, sbr. 145. gr. laga um loftferðir nr. 60/1998, með síðari breytingum og öðlast þegar gildi. Um leið fellur reglugerð nr. 404/2008, um skírteini flugumferðarstjóra, úr gildi. Innanríkisráðuneytinu, 11. nóvember 2013. Hanna Birna Kristjánsdóttir. Ragnhildur Hjaltadóttir. VIÐAUKI
(sjá PDF-skjal) |