I. KAFLI

Almennt ákvæði.

1. gr.

Gildissvið.

Reglur þessar gilda um form, efni og löggildingu gerðabóka og um hvað kjörstjórnum er skylt að bóka í gerðabók við kosningar til Alþingis og sveitarstjórna, við forsetakjör og þjóðar­atkvæða­greiðslur. Reglur þessar gilda einnig um gerð, merkingar og notkun embættisinnsigla við sömu kosn­ingar.

II. KAFLI

Gerðabækur, fundargerðir og bókanir kjörstjórna.

2. gr.

Löggilding gerðabóka landskjörstjórnar,
yfirkjörstjórna og umdæmiskjörstjórna.

Landskjörstjórn leggur til og löggildir gerðabækur landskjörstjórnar, yfirkjörstjórna kjördæma, umdæmis­kjörstjórna og yfirkjörstjórna sveitarfélaga.

Gerðabækur sem notaðar hafa verið við kosningar fyrir gildistöku þessara reglna skulu halda gildi sínu.

3. gr.

Gerðabækur hverfiskjörstjórna og undirkjörstjórna.

Yfirkjörstjórn sveitarfélags lætur hverfiskjörstjórnum og undirkjörstjórnum í té gerðabækur og lög­gildir þær en yfirkjörstjórn er heimilt að ákveða að hverfiskjörstjórnir eða undirkjörstjórnir noti sér­stök eyðublöð eða laus blöð í stað gerðabókar.

4. gr.

Fundargerðir.

Landskjörstjórn, yfirkjörstjórnir og umdæmiskjörstjórnir skulu halda fundargerðir sem ritaðar eru eða færðar í gerðabók. Í fundargerð skal eftirfarandi koma fram:

1. Fundartími og fundarstaður.
2. Nafn fundarritara.
3. Nöfn viðstaddra fulltrúa kjörstjórnar, varamanna þeirra, áheyrnarfulltrúa og annarra þeirra sem fund sitja sem og viðverutíma.
4. Dagskrármál sem tekin eru fyrir og niðurstaða þeirra.
5. Upplýsingar sem kjörstjórn óskar eftir að bókaðar séu í fundargerð.
6. Bókanir fulltrúa, áheyrnarfulltrúa eða annarra þeirra sem rétt eiga að lögum til bókunar.
7. Lok fundar.

Fundargerðir skulu staðfestar og undirritaðar með eigin hendi af fulltrúum viðkomandi kjör­stjórnar í lok fundar. Sé fundargerð færð í tölvu er heimilt að undirrita fundargerð með fullgildri rafrænni undirritun. Fundargerðir sem færðar eru í tölvu eða á lausum blöðum skulu færðar inn í gerðabók kjörstjórnar eftir að þær hafa verið undirritaðar.

5. gr.

Bókanir landskjörstjórnar.

Landskjörstjórn skal bóka um eftirfarandi í gerðabók:

1. Ákvarðanir um mörk kjördæma, skv. 1. mgr. 8. gr. kosningalaga.
2. Breytingu á fjölda kjördæmissæta, skv. 1. og 2. mgr. 10. gr. kosningalaga.
3. Hvenær kosningar fara fram, skv. 1. mgr. 23. gr., 1. mgr. 24. gr. 1. mgr. 25. gr. og 4. mgr. 26. gr. kosningalaga.
4. Ákvarðanir um undanþágur til notkunar prentaðrar kjörskrár, skv. 35. gr. kosningalaga.
5. Tilhögun móttöku á framboðum og um móttöku framboða, skv. 1. mgr. 36. gr. og 1. mgr. 50. gr. kosningalaga.
6. Niðurstöðu athugana á skilyrðum framboðs og framkomin mótmæli ef einhver eru skv. 4. mgr. 42. gr. kosningalaga.
7. Breytingu á röð frambjóðenda ef frambjóðandi deyr skv. 43. gr. kosningalaga.
8. Boðun umboðsmanna á fund um yfirferð framboða skv. 1. mgr. 44. gr. kosningalaga.
9. Hverjir gallar á framboði eru, ef við á, og hve langan frest umboðsmenn fá til að leiðrétta þá skv. 44. gr. kosningalaga.
10. Ákvarðanir um gildi framboða fyrir kosningar til Alþingis og forsetakjörs, skv. 1. mgr. 45. gr. og 2. mgr. 50. gr. kosningalaga.
11. Ákvarðanir um gerð og útlit kjörfundargagna og utankjörfundargagna, skv. III. – IV. kafla reglugerðar um kjörgögn.
12. Afgreiðslu og útsendingu kjörseðla til yfirkjörstjórna.
13. Tilkynningu um niðurstöðu talningar við forsetakjör og þjóðaratkvæðagreiðslur, skv. 107. gr. kosningalaga.
14. Úthlutun þingsæta, skv. XVI. kafla kosningalaga.
15. Tilkynningar og ákvarðanir vegna þjóðaratkvæðagreiðslna og forsetakjörs, skv. XVIII. kafla kosningalaga.
16. Heimildir sem veittar hafa verið kosningaeftirlitsmönnum til að fylgjast með kosningum, skv. 138. gr. kosningalaga.
17. Nýjan kjördag, skv. 2. mgr. 125. gr. kosningalaga, sé um uppkosningu að ræða.
18. Hafi kæra borist landskjörstjórn, skv. 2. mgr. 127. gr. kosningalaga, og að umboðsmönnum framboða hafi verið tilkynnt um hana.
19. Hverjir eru umboðsmenn framboða, boðanir, samskipti, upplýsingagjöf, athugasemdir sem þeir vilja fá bókaðar og annað það sem skiptir máli, sbr. X. kafla kosningalaga og reglugerð um umboðsmenn.
20. Aðrar ákvarðanir, afgreiðslur eða upplýsingar sem varða framkvæmd kosninga samkvæmt lögum, stjórnvaldsfyrirmælum eða eðli máls.

6. gr.

Bókanir yfirkjörstjórna kjördæma.

Yfirkjörstjórnir kjördæma skulu bóka um eftirfarandi í gerðabók:

1. Hvert er aðsetur kjörstjórnarinnar og hver er oddviti hennar. Ef yfirkjörstjórn ákveður að umdæmiskjörstjórn sé kosin þá hverjir séu nefndarmenn hennar og staðsetningu skv. 3. mgr. 16. gr. kosningalaga.
2. Hvar og hvenær talning atkvæða mun fara fram, skv. 2. mgr. 98. gr. kosningalaga.
3. Móttöku kjörgagna frá landskjörstjórn.
4. Afgreiðslu og útsendingu kjörgagna til kjörstjórna ásamt raðnúmerum innsigla.
5. Ónotaða kjörseðla í vörslum yfirkjörstjórnar og tilhögun vörslu.
6. Móttöku utankjörfundaratkvæða, skv. 92. gr. kosningalaga.
7. Hvaða einstaklingum er falið að flytja kjörgögn frá kjörstað á talningarstað.
8. Kjörsókn í kjördæminu.
9. Flokkun atkvæða fyrir lok kjörfundar skv. 2. mgr. 99. gr. kosningalaga, þ.m.t. um móttöku atkvæðakassa, hvenær flokkun hefst, hvenær rými þar sem flokkun fer fram er lokað og af hverjum, hvaða fulltrúar yfirkjörstjórnar eru viðstaddir sem og umboðsmenn og kosninga­eftirlitsmenn og hvenær rými er opnað.
10. Upphaf og lok kjörfundar, flokkunar og talningar.
11. Hvenær og hvernig boðun umboðsmanna til að vera viðstaddir talningu atkvæða, fram­kvæmd hennar og uppgjöri er háttað, skv. 2. mgr. 100. gr. kosningalaga.
12. Hvaða umboðsmenn og kosningaeftirlitsmenn eru viðstaddir talningu.
13. Grundvöll áminningar og brottvísunar umboðsmanns ef við á, ef umboðsmaður fylgir ekki lögum og reglum eða viðhefur háttsemi sem raskar eða truflar framkvæmd kosninganna, flokkunar eða talningu.
14. Móttöku atkvæðakassa og kjörgagna frá yfirkjörstjórnum sveitarfélaga eftir lok kjörfundar og hverjir afhenda gögnin.
15. Framvindu talningar, ákvarðanir tengdar talningu og hvenær niðurstaða liggur fyrir.
16. Um vörslu gagna ef hlé eða frestun verður á talningu.
17. Fjölda fylgibréfa sem koma til skoðunar yfirkjörstjórnar og hve mörg utankjörfundaratkvæði eru talin ógild vegna vankanta á þeim.
18. Fjölda ágreiningsatkvæða sem koma til úrskurðar, hve mörg eru metin gild og fyrir hvaða framboð eða svarkost, hve mörg ógild og af hvaða ástæðu og hve mörg er ágreiningur um gildi við umboðsmenn.
19. Niðurstöðu talningar, skv. 107. gr. kosningalaga.
20. Fjölda ónýtra kjörseðla.
21. Fjölda óvistaðra atkvæða (utankjörfundaratkvæði).
22. Fjölda auðra atkvæða.
23. Fjölda ágreiningsseðla sem sendir eru landskjörstjórn skv. 3. mgr. 99. gr. kosningalaga.
24. Tilkynningu um niðurstöðu talningar við kosningar til Alþingis, skv. 107. gr. kosningalaga.
25. Frágang kjörgagna og vörslu þeirra ásamt raðnúmeri innsigla.
26. Skýrsluskil til landskjörstjórnar, skv. 106. gr. og 120. gr. kosningalaga.
27. Eyðingu kjörgagna að loknum kosningum.
28. Frestun kosninga eða uppkosningu ef við á og af hvaða ástæðu, skv. 124. gr. kosningalaga.
29. Hverjir eru umboðsmenn framboða, boðanir, samskipti, upplýsingagjöf, athugasemdir sem þeir vilja fá bókaðar og annað það sem skiptir máli, sbr. X. kafla kosningalaga og reglugerð um umboðsmenn.
30. Aðrar ákvarðanir, afgreiðslur eða upplýsingar sem varða undirbúning og framkvæmd kosn­inga samkvæmt lögum, stjórnvaldsfyrirmælum eða eðli máls.

7. gr.

Umdæmiskjörstjórnir.

Ef umdæmiskjörstjórn er skipuð skal um bókanir hennar fara skv. 6. gr. eftir því sem við á.

8. gr.

Bókanir yfirkjörstjórna sveitarfélaga.

Yfirkjörstjórnir sveitarfélaga skulu bóka um eftirfarandi í gerðabók:

1. Hvert er aðsetur kjörstjórnarinnar og hver er oddviti hennar.
2. Móttöku kjörfundargagna frá yfirkjörstjórn kjördæmis við aðrar kosningar en sveitar­stjórnar­kosningar.
3. Afgreiðslu og útsendingu kjörfundargagna til hverfis- eða undirkjörstjórna ásamt raðnúmeri innsigla.
4. Ónotaða kjörseðla í vörslum yfirkjörstjórnar og tilhögun vörslu.
5. Afgreiðslu og sendingarmáta atkvæðakassa til yfirkjörstjórnar við flokkun atkvæða skv. 2. mgr. 99. gr. kosningalaga.
6. Móttöku atkvæðakassa og kjörgagna frá hverfis- og undirkjörstjórnum (ef við á) og frágang, afgreiðslu, sendingu og sendingarmáta sömu gagna til yfirkjörstjórnar kjördæmis fyrir flokkun atkvæða og eftir lok kjörfundar.
7. Hvaða einstaklingum er falið að flytja kjörgögn frá kjörstað að talningarstað.
8. Kjörseðla sem ónýtast, fjölda utankjörfundaratkvæða sem ekki verða tekin til greina og óvistuð atkvæði sem móttekin eru af yfirkjörstjórn.
9. Aðrar ákvarðanir, afgreiðslur eða upplýsingar sem varða undirbúning og framkvæmd kosn­inga samkvæmt lögum, stjórnvaldsfyrirmælum eða eðli máls.

Við sveitarstjórnarkosningar skal yfirkjörstjórn sveitarfélags bóka um eftirfarandi í gerðabók:

1. Tilhögun móttöku á framboðum í sveitarfélaginu og móttöku framboða, skv. 1. mgr. 36. gr. kosningalaga.
2. Niðurstöðu athugana á skilyrðum framboðs og framkomin mótmæli ef einhver eru skv. 4. mgr. 42. gr. kosningalaga.
3. Breytingu á röð frambjóðenda ef frambjóðandi deyr, skv. 43. gr. kosningalaga.
4. Boðun umboðsmanna á fund um yfirferð framboðslista skv. 1. mgr. 44. gr. kosningalaga.
5. Hverjir gallar á framboði eru, ef við á, og hve langan frest umboðsmenn fá til að leiðrétta þá skv. 44. gr. kosningalaga.
6. Ákvarðanir um gildi framboðslista, skv. 46. gr. kosningalaga.
7. Úrskurði um kjörgengi frambjóðenda, skv. 2. mgr. 48. gr. kosningalaga.
8. Ákvarðanir um gerð og útlit kjörfundargagna skv. IV. kafla reglugerðar um kjörgögn.
9. Móttöku utankjörfundaratkvæða, skv. 92. gr. kosningalaga.
10. Móttöku atkvæðakassa frá hverfis- eða undirkjörstjórnum við flokkun atkvæða skv. 2. mgr. 99. gr. og eftir lok kjörfundar.
11. Framvinda talningar, ákvarðanir tengdar talningu og hvenær niðurstaða liggur fyrir.
12. Um vörslu gagna ef hlé eða frestun verður á talningu.
13. Flokkun atkvæða fyrir lok kjörfundar skv. 2. mgr. 99. gr. kosningalaga, þ.m.t. um móttöku atkvæðakassa, hvenær flokkun hefst, hvenær rými þar sem flokkun fer fram er lokað og af hverjum, hvaða fulltrúar yfirkjörstjórnar eru viðstaddir sem og umboðsmenn og kosninga-eftirlitsmenn og hvenær rými er opnað.
14. Kjörsókn í sveitarfélaginu.
15. Hvar og hvenær talning atkvæða mun fara fram, skv. 2. mgr. 98. gr. kosningalaga.
16. Upphaf og lok kjörfundar.
17. Hvenær og hvernig boðun umboðsmanna til að vera viðstaddir talningu atkvæða, fram­kvæmd hennar og uppgjör er háttað, skv. 2. mgr. 100. gr. kosningalaga.
18. Upphaf og lok talningar og hvaða umboðsmenn og kosningaeftirlitsmenn eru viðstaddir talningu.
19. Grundvöll áminningar og brottvísunar umboðsmanns ef við á, ef umboðsmaður fylgir ekki lögum og reglum eða viðhefur háttsemi sem raskar eða truflar framkvæmd kosninganna, flokkunar eða taln­ingu.
20. Fjölda fylgibréfa sem koma til skoðunar yfirkjörstjórnar og hve mörg utankjörfundaratkvæði eru talin ógild vegna vankanta á þeim.
21. Fjölda vafaatkvæða sem koma til úrskurðar, hve mörg eru metin gild og fyrir hvaða fram­boð, hve mörg ógild og af hvaða ástæðu og hve mörg er ágreiningur um gildi við umboðs­menn.
22. Fjölda ónýtra kjörseðla.
23. Fjölda óvistaðra atkvæða (utankjörfundaratkvæði).
24. Fjölda auðra atkvæða.
25. Niðurstöðu talningar.
26. Frágang kjörgagna og vörslu þeirra ásamt raðnúmeri innsigla.
27. Tilkynningar um niðurstöðu talningar, skv. 107. gr. kosningalaga.
28. Tilkynningar til nýrra sveitarstjórnarfulltrúa og varamanna um kosningu þeirra, skv. 119. gr. kosningalaga.
29. Eyðingu kjörgagna að loknum kosningum.
30. Frestun kosninga eða uppkosningu ef við á og af hvaða ástæðu, skv. 124. gr. kosningalaga.
31. Skýrsluskil til landskjörstjórnar, skv. 119. gr. a. kosningalaga.
32. Hverjir eru umboðsmenn framboða, boðanir, samskipti, upplýsingagjöf, athugasemdir sem þeir vilja fá bókaðar og annað það sem skiptir máli, sbr. X. kafla kosningalaga og reglugerð um umboðsmenn.
33. Aðrar ákvarðanir, afgreiðslur eða upplýsingar sem varða undirbúning og framkvæmd kosn­inga samkvæmt lögum, stjórnvaldsfyrirmælum eða eðli máls.

Ef ekki er til staðar hverfis- eða undirkjörstjórn skal yfirkjörstjórn sveitarfélags einnig bóka skv. 9. gr. reglugerðar þessarar.

9. gr.

Bókanir hverfis- og undirkjörstjórna sveitarfélaga.

Hverfis- og undirkjörstjórnir skulu bóka um eftirfarandi í gerðabók:

1. Upphaf og lok kjörfundar.
2. Hvar og hvenær kjörgögn eru afhent og hver tekur við þeim.
3. Að gengið hafi verið úr skugga um að atkvæðakassar séu tómir og síðan innsiglaðir, skv. 2. mgr. 79. gr. kosningalaga.
4. Viðveru umboðsmanna og ef þeir innsigla kassa þá hverjir og hvenær.
5. Athugasemdir umboðsmanna sem þeir vilja fá bókaðar í gerðabók kjörstjórnar.
6. Viðveru kosningaeftirlitsmanna.
7. Hvaða kjósendur hljóta aðstoð, kyn þeirra og hver aðstoðar skv. 4. mgr. 89. gr. kosn­inga­laga.
8. Afsal kosningaréttar kjósanda í sinni kjördeild og hvar hann kýs. Einnig skal bókað um afsalið í þeirri kjördeild sem kjósandi kýs skv. II. ákvæði til bráðabirgða kosningalaga.
9. Utankjörfundaratkvæði sem kjósandi sendir í kjördeild, en hann er ekki á kjörskrá þar, skv. 4. mgr. 93. gr. kosningalaga.
10. Móttöku utankjörfundargagna.
11. Tilkynningu sveitarstjórnar um breytingu á kjörskrá.
12. Fjölda kjósenda sem greiddu atkvæði á kjördag og fjöldi utankjörfundaratkvæða sem bárust í kjördeild.
13. Afhendingu atkvæðakassa og kjörgagna til yfirkjörstjórnar.
14. Frágang kjörgagna eftir lok kjörfundar.
15. Annað það sem mælt er fyrir um í kosningalögum, reglugerðum og öðrum stjórnvalds­fyrirmælum, eða samkvæmt fyrirmælum yfirkjörstjórnar sveitarfélags.

III. KAFLI

Embættisinnsigli.

10. gr.

Gerð innsigla.

Landskjörstjórn ákveður gerð, merkingar og notkun innsigla og lætur framleiða þau. Innsigli skal vera límborði sem merktur er landskjörstjórn og þannig gerður að þess sjáist merki ef innsigli er rofið eða átt er við það. Á innsiglislímborða skal vera raðtölunúmer og honum skal fylgja límborði með sama raðtölunúmeri sem kjörstjórn eða kjörstjóri bókar um og límir í gerðabók eða varðveitir með öðrum hætti. Á innsiglislímborða skal vera nægilegt svæði fyrir dagsetningu, heiti kjörstjórnar eða kjörstjóra og nafn þess sem það skráir.

11. gr.

Innsigli rofið.

Við rof á innsigli skal þess ávallt gætt að raðtölunúmer sé það sama og raðtölunúmer sem kjörstjóri eða kjörstjórn hefur bókað um og varðveitt.

12. gr.

Afhending innsigla, varsla þeirra o.fl.

Landskjörstjórn skal láta sýslumönnum og yfirkjörstjórnum í té innsigli sem notuð skulu við kosningar.

Kjörstjórnir og kjörstjórar skulu tryggja að innsigli í vörslu þeirra séu ávallt geymd með tryggum og öruggum hætti.

Atkvæðakassi skal ávallt innsiglaður áður en hann er tekinn í notkun eftir að gætt hefur verið að því að hann sé tómur.

13. gr.

Skyldur kjörstjóra innanlands til að innsigla.

Kjörstjóri skal innsigla atkvæðakassa fyrir atkvæði kjósanda sem greidd eru utan kjörfundar í því umdæmi þar sem hann er á kjörskrá, sbr. 1. mgr. 76. gr. kosningalaga.

Kjörstjórar skulu að jafnaði innsigla atkvæðakassa sem þeir nota til atkvæðagreiðslu á heilbrigðis- og öldrunarstofnunum, stofnunum fyrir fatlað fólk og í fangelsum og í heimahúsum. Þó er heimilt að safna utankjörfundaratkvæðum í umslag sem innsiglað er í stað atkvæðakassa þegar einungis er um örfáa kjósendur að ræða. Að lokinni slíkri atkvæðagreiðslu er kjörstjóra heimilt að rjúfa innsigli atkvæðakassans eða umslagsins og setja utankjörfundaratkvæði í viðeigandi atkvæða­kassa.

Innsigla skal rauf atkvæðakassa fyrir flutning þeirra til yfirkjörstjórnar kjördæmis eða yfir­kjörstjórn­ar sveitarfélags.

Kjörstjórum er heimilt að nota innsigli við aðrar aðstæður þar sem þeir telja rétt að innsigli sé notað. Skal það skráð í skrá kjörstjóra.

14. gr.

Skyldur kjörstjórna til að innsigla ónotaða kjörseðla.

Innsigla skal ónotaða kjörseðla áður en þeir eru sendir til kjörstjórna en séu þeir afhentir í órofinni vörslu, þ.e. afhentir af fulltrúa einnar kjörstjórnar í hendur fulltrúa annarrar kjörstjórnar, er heimilt að afhenda kjörseðla í óinnsigluðum umbúðum. Varðveita skal ónotaða kjörseðla sem ekki hafa verið afhentir kjörstjórnum með tryggilegum hætti og fyrir luktum dyrum sem skulu inn­siglaðar.

15. gr.

Skyldur kjörstjórna til að innsigla utankjörfundaratkvæði.

Innsigla skal atkvæðakassa með utankjörfundaratkvæðum sem borist hafa fyrir kjördag, sbr. 3. mgr. 77. gr. kosningalaga.

Heimilt er að rjúfa innsigli skv. 1. mgr. til að hefja flokkun á utankjörfundaratkvæðum í réttar kjör­deildir skv. 4. mgr. 92. gr. kosningalaga, eða ef hlé er gert á flokkun, skal innsigla ílát eða herbergi, þar sem utankjörfundaratkvæðin eru varðveitt.

16. gr.

Skyldur kjörstjórna til að innsigla atkvæðakassa.

Við upphaf kjördags skal gæta þess að atkvæðakassar séu tómir og innsigla þá síðan. Sé skipt um atkvæðakassa á kjördag skal einnig innsigla raufar atkvæðakassanna sem teknir eru úr notkun og gæta þess að nýir atkvæðakassar séu tómir og innsiglaðir.

17. gr.

Skyldur kjörstjórna til að innsigla að loknum kjörfundi.

Þegar kjörfundi hefur verið slitið skal hver undirkjörstjórn ganga frá kjörgögnum til afhendingar yfirkjörstjórnar sem annast talningu atkvæða. Innsigla skal:

1. Raufar atkvæðakassa.
2. Atkvæðaumslög með ónýtum kjörseðlum.
3. Atkvæðaumslög með utankjörfundaratkvæðum sem vafi er um hvort taka eigi til greina.
4. Atkvæðaumslög með óvistuðum atkvæðum.
5. Atkvæðaumslög eða aðrar umbúðir með ónotuðum kjörseðlum.

Eftir að kjörstjórn hefur gengið frá kjörgögnum skv. 1. mgr. mega hin innsigluðu kjörgögn og inn­sigli kjörstjórnar ekki vera í vörslu sama manns.

Ef talning atkvæða fer fram á kjörstað má kjörstjórn afhenda yfirkjörstjórn eða umdæmis­kjörstjórn raufir atkvæðakassa óinnsiglaðar.

18. gr.

Skyldur kjörstjórna til að innsigla við og að lokinni talningu.

Sé hlé gert á fundi yfirkjörstjórnar eða fundi hennar frestað á meðan talning stendur yfir skal yfir­kjörstjórn tryggja að notaðir og ónotaðir kjörseðlar ásamt öðrum kjörgögnum séu varðveittir með tryggilegum hætti, svo sem í innsigluðu íláti eða fyrir luktum dyrum sem jafnframt skulu inn­siglaðar. Þetta á einnig við ef gert er hlé á milli skila á fyrri og seinni hluta talningarskýrslna, sbr. 25. gr. reglugerðar um talningu.

Að talningu lokinni skal innsigla:

1. Ílát með notuðum kjörseðlum og skal gildum og ógildum kjörseðlum haldið sér.
2. Ílát með ónotuðum kjörseðlum.
3. Atkvæðaumslög með ágreiningsseðlum.
4. Ílát með kjörskrám.

Kjörstjórnum er heimilt er að rjúfa innsigli íláta með kjörskrám til að sinna skýrslugerð til Hag­stofunnar. Að þeirri vinnu lokinni skulu kjörskrár innsiglaðar að nýju.

19. gr.

Aðrar heimildir til innsiglunar.

Kjörstjórnum er heimilt að nota innsigli við aðrar aðstæður þar sem þeir telja rétt að innsigli sé notað. Skal þá um það bóka í gerðabók.

IV. KAFLI

Lokaákvæði.

20. gr.

Lagastoð og gildistaka.

Reglur þessar eru settar skv. 6. mgr. 14. gr., 2. mgr. 20. gr. og 2. mgr. 79. gr. kosningalaga nr. 112/2021 og taka þegar gildi. Ráðherra staðfestir reglur II. kafla í samræmi við 2. mgr. 20. gr. kosningalaga. Við gildistöku reglna þessara falla úr gildi fyrri reglur um gerðabækur kjörstjórna og innsigli við kosningar frá 6. apríl 2022 nr. 422/2022.

Landskjörstjórn, 31. október 2023.

Kristín Edwald.

Staðfesting ráðherra.
(sjá PDF-skjal)