1. gr.

Gildissvið.

Reglur þessar gilda um rekstrarfélög verðbréfasjóða, sbr. 1. gr. laga nr. 116/2021 um verðbréfa­sjóði, og rekstraraðila sérhæfðra sjóða, sbr. 1. gr. laga nr. 45/2020 um rekstraraðila sérhæfðra sjóða.

2. gr.

Upplýsingagjöf vegna starfsemi yfir landamæri.

Samkvæmt 1. og 2. mgr. 105. gr. laga nr. 116/2021 skal rekstrarfélag með staðfestu hér á landi sem hyggst reka verðbréfasjóð eða veita þjónustu skv. 3. mgr. 5. gr. laganna í öðru ríki innan EES tilkynna það Fjármálaeftirlitinu og skal tilkynningin innihalda þær upplýsingar sem til­greindar eru í 1. og 2. mgr. 105. gr. laganna. Samkvæmt 1. mgr. 107. gr. laga nr. 116/2021 skal rekstrarfélag með stað­festu í öðru ríki inn­an EES sem sækir um staðfestingu verðbréfasjóðs með staðfestu hér á landi senda Fjármálaeftirlitinu, til við­bótar upp­lýsingum skv. 27. og 32. gr. laganna, þær upplýsingar sem tilgreindar eru í 1. mgr. 107. gr. lag­anna. Rekstraraðili sérhæfðs sjóðs sem hyggur á starfsemi yfir landamæri skal tilkynna Fjármála­eftir­litinu um þá starfsemi sína eða sérhæfðs sjóðs í sínum rekstri og skulu tilkynningunni fylgja þær upplýsingar sem kveðið er á um í viðeigandi ákvæði VIII. kafla laga nr. 45/2020. Reglur þessar eru settar til að leiða í íslenskan rétt framseldar reglugerðir framkvæmda­stjórnarinnar (ESB) sem tilgreina nánar þær upplýsingar sem tilkynna skal til Fjár­mála­eftirlitsins vegna framangreindrar starfsemi yfir landamæri.

3. gr.

Innleiðing reglugerða.

Með reglum þessum öðlast gildi hér á landi eftirtaldar reglugerðir framkvæmdastjórnarinnar (ESB):

1. Framseld reglugerð framkvæmdastjórnarinnar (ESB) 2024/911 frá 15. desember 2023 um viðbætur við tilskipun Evrópuþingsins og ráðsins 2009/65/EB að því er varðar tæknilega eftirlitsstaðla þar sem tilgreindar eru upplýsingarnar sem tilkynna skal í tengslum við starf­semi rekstrarfélaga og verðbréfasjóða sem nær yfir landamæri, sem tekin var upp í EES-samn­inginn með ákvörðun sameiginlegu EES-nefndarinnar nr. 126/2024 frá 12. júní 2024. Reglu­gerðin er birt í EES-viðbæti við Stjórnartíðindi ESB nr. 65 frá 29. ágúst 2024, bls. 302-305.
2. Framseld reglugerð framkvæmdastjórnarinnar (ESB) 2024/912 frá 15. desember 2023 um viðbætur við tilskipun Evrópuþingsins og ráðsins 2011/61/ESB að því er varðar tæknilega eftirlitsstaðla sem tilgreina upplýsingarnar sem tilkynna skal í tengslum við starfsemi rekstrar­aðila sérhæfðra sjóða yfir landamæri, sem tekin var upp í EES-samninginn með ákvörðun sameiginlegu EES-nefndarinnar nr. 127/2024 frá 12. júní 2024. Reglugerðin er birt í EES-viðbæti við Stjórnartíðindi ESB nr. 65 frá 29. ágúst 2024, bls. 306-309.

4. gr.

Gildistaka.

Reglur þessar, sem settar eru með heimild í 14. og 15. tölul. 2. mgr. 134. gr. laga nr. 116/2021 og 9. tölul. 2. mgr. 117. gr. laga nr. 45/2020, öðlast þegar gildi.

Seðlabanka Íslands, 4. desember 2024.