1. gr.
Heimilt er að hafa fangelsi deildaskipt, skv. 18. gr. laga nr. 15/2016 um fullnustu refsinga. Öryggisdeild er í húsi 1, deild A í Fangelsinu Litla-Hrauni.
2. gr.
Á öryggisdeild er unnt að vista fanga sem gerst hafa sekir um alvarleg eða ítrekuð agabrot, eru taldir stefna öryggi fangelsisins í hættu eða geta ekki vistast með öðrum föngum vegna hegðunar sinnar.
3. gr.
Forstöðumaður fangelsisins tekur ákvörðun um að vista skuli fanga á öryggisdeild, sbr. 5. mgr. 21. gr. laga um fullnustu refsinga nr. 15/2016. Slíka ákvörðun skal rökstyðja skriflega og bóka. Vistun á öryggisdeild má ákvarða í allt að 3 mánuði í senn.
4. gr.
Stundi fangi, sem vistaður er á öryggisdeild, vinnu eða nám skal sú starfsemi að jafnaði fara fram þar.
5. gr.
Um heimsóknir til fanga sem vistaðir eru á öryggisdeild gilda ákvæði 45.–48. gr. laga um fullnustu refsinga nr. 15/2016, reglugerð um fullnustu refsinga og verklagsreglur Fangelsismálastofnunar um heimsóknir í fangelsi.
6. gr.
Um símtöl fanga sem vistaðir eru á öryggisdeild gildir 49. gr. laga um fullnustu refsinga. Taka skal upp og hlusta á öll símtöl fanga á öryggisdeild að undanskildum símtölum við lögmann, prest eða annan sambærilegan fulltrúa trúfélags eða lífsskoðunarfélags sem fangi tilheyrir, opinberar stofnanir og umboðsmann Alþingis.
7. gr.
Fangi sem vistaður er á öryggisdeild á rétt á útiveru og að iðka tómstundastörf, líkamsrækt og íþróttir í frítíma eftir því sem aðstæður í fangelsi leyfa í að minnsta kosti eina og hálfa klukkustund á dag, nema það sé ósamrýmanlegt góðri reglu og öryggi í fangelsi. Útivera og tómstundir fanga á öryggisdeild skulu að jafnaði fara fram á öðrum tíma en útivera og tómstundir annarra fanga.
8. gr.
Forstöðumaður getur leyft fanga sem vistaður er á öryggisdeild að hafa í klefa sínum sjónvarpstæki, útvarpstæki og leikjatölvu án nettengingar. Forstöðumaður getur heimilað fanga á öryggisdeild að hafa aðgang að nettengdri tölvu í sameiginlegu rými deildarinnar.
9. gr.
Forstöðumaður getur ákveðið að klefar fanga sem vistast á öryggisdeild séu ekki opnir á sama tíma ef nauðsynlegt þykir vegna öryggis í fangelsinu.
10. gr.
Reglur þessar eru settar af Fangelsismálastofnun ríkisins og byggjast á heimild í 98. gr. laga um fullnustu refsinga nr. 15/2016. Öðlast þær þegar gildi.
Jafnframt falla úr gildi reglur um vistun fanga á öryggisdeild Fangelsisins Litla-Hrauni, dagsettar 6. júní 2012.
Fangelsismálastofnun ríkisins, 1. júní 2016.
Páll E. Winkel.
|