1. gr.

Eftirfarandi breytingar verða á 1. mgr. 39. gr. samþykktarinnar:

1. 1. tl. breytist og orðast svo: Menningar- og markaðsnefnd. Þrír aðalmenn og jafnmargir til vara. Menningar- og markaðsnefnd fer með lögbundin verkefni sem tengjast málaflokkum sem undir hana falla og önnur þau verkefni sem tengjast þeim og undir nefndina falla. Um er að ræða málefni bókasafna skv. ákvæðum bókasafnalaga, nr. 150/2012, og málefni héraðs­skjalasafns, sbr. lög um opinber skjalasöfn, nr. 77/2014, málefni félagsheimila, sbr. ákvæði laga um félagsheimili, nr. 107/1970, málefni byggðasafns, sbr. ákvæði safnalaga, nr. 141/2011, málefni húsaverndar og verndun menn­ingar­minja, sbr. lög um menningarminjar, nr. 80/2012. Að auki skal nefndin hlutast til um og móta tillögur til sveitar­stjórnar um ferða-, markaðs- og kynningarmál fyrir Hvalfjarðarsveit auk menningar­mála og listviðburða.
2. 2. tl. breytist og orðast svo: Velferðar- og fræðslunefnd. Fimm aðalmenn og jafnmargir til vara. Velferðar- og fræðslunefnd fer með lögbundin verkefni sem tengjast málaflokkum sem undir hana falla. Um er að ræða verkefni félagsmálanefndar skv. 5. gr. laga um félags­þjónustu sveitarfélaga, nr. 40/1991, jafnréttismál sveitarfélagsins skv. 2. mgr. 13. gr. laga um stjórn­sýslu jafnréttismála, nr. 151/2020, verkefni á sviði húsnæðismála, sbr. ákvæði laga um húsnæðismál, nr. 44/1998, ákvæði laga um húsnæðisbætur, nr. 75/2016, og laga um almennar íbúðir, nr. 52/2016, málefni fatlaðs fólks samkvæmt lögum um þjónustu við fatlað fólk með langvarandi stuðningsþarfir, nr. 38/2018, málefni aldraðra, sbr. ákvæði laga nr. 125/1999, málefni innflytjenda, sbr. ákvæði laga nr. 116/2012, verkefni vegna daggæslu í heimahúsum, sbr. reglugerð nr. 907/2005, auk verkefna á sviði forvarna. Nefndin fer ekki með yfirstjórn í barnaverndarþjónustu sveitarfélagsins samkvæmt barnaverndarlögum, nr. 80/2002, en hefur, í samræmi við samning sveitarfélagsins við Borgarbyggð um barna­verndar­þjónustu, eftirlitshlutverki að gegna gagnvart samningnum. Velferðar- og fræðslu­nefnd hefur umsjón með styrkveitingum og samskiptum sveitarfélagsins við einstak­linga og félög vegna frístundamála. Velferðar- og fræðslunefnd fylgist með að starfsemi íþrótta- og æskulýðsstarfs sé samkvæmt ákvæðum æskulýðslaga, nr. 70/2007. Velferðar- og fræðslu­nefnd skal hlutast til um mótun, setningu og endurskoðun forvarnarstefnu og skipu­lag for­varnar­starfs. Velferðar- og fræðslunefnd hefur umsjón með frístunda- og íþrótta­málum á vegum sveitarfélagsins m.a. skoðun á framboði tómstunda- og félagsstarfs í sveitar­félaginu. Velferðar- og fræðslunefnd hefur umsjón með rekstri vinnuskóla í Hval­fjarðar­sveit og íþróttamannvirkja og sundlauga sem falla undir umsjón velferðar- og fræðsludeildar. Velferðar- og fræðslunefnd fer með verkefni skólanefndar skv. 6. gr. laga um grunnskóla, nr. 91/2008, málefni leikskóla samkvæmt lögum um leikskóla, nr. 90/2008, málefni tónlistar­skóla samkvæmt lögum um fjárhagslegan stuðning við tónlistarskóla, nr. 75/1985, umsjón og eftirlit með framkvæmd skólaaksturs, sbr. ákvæði reglna um skóla­akstur í grunnskóla, nr. 656/2009. Velferðar- og fræðslunefnd skal, eftir því sem við á, fylgjast með málefnum er varða framhaldsskóla og sveitarfélög. Velferðar- og fræðslu­nefnd hefur umsjón með starfsemi félagsmiðstöðva og annarrar frístundaaðstöðu sem fellur undir umsjón skólastjóra. Velferðar- og fræðslunefnd skal fylgjast með og meta reglulega þörf fyrir rekstur frístunda­heimilis, sbr. ákvæði 33. gr. laga um grunnskóla, nr. 91/2008.
3. 3. tl. fellur brott og uppfærast eftirfarandi töluliðir í samræmi við það.

2. gr.

Samþykkt þessi sem sveitarstjórn Hvalfjarðarsveitar hefur sett skv. ákvæðum 9. og 18. gr. sveitarstjórnarlaga nr. 138/2011, staðfestist hér með til að öðlast þegar gildi.

Innviðaráðuneytinu, 14. mars 2025.

F. h. samgöngu- og sveitarstjórnarráðherra,

Aðalsteinn Þorsteinsson.