I. KAFLI

Almenn ákvæði.

1. gr.

Lagagrundvöllur.

Reglur þessar byggja á eftirfarandi lögum:

Lög um félagsþjónustu sveitarfélaga nr. 40/1991. Í lögunum er fjallað um stuðningsþjónustu í VII. kafla, málefni barna og ungmenna í VIII. kafla, þjónustu við aldraða í X. kafla og þjónustu við fatlað fólk í XI. kafla.
Lög um þjónustu við fatlað fólk með langvarandi stuðningsþarfir nr. 38/2018. Í III. kafla í lögunum er fjallað um stoðþjónustu og þjónustu við börn í IV. kafla.

Í reglum þessum eru hugtökin stuðningsþjónusta, þjónusta, aðstoð eða stuðningur notuð hvort heldur stuðningur er veittur skv. lögum um félagsþjónustu sveitarfélaga eingöngu eða lögum um þjónustu við fatlað fólk með langvarandi stuðningsþarfir.

Við framkvæmd reglna þessara er horft til þeirra alþjóðlegu skuldbindinga sem íslensk stjórn­völd hafa gengist undir, einkum samnings Sameinuðu þjóðanna um réttindi fatlaðs fólks og réttindi barna.

2. gr.

Markmið.

Markmið stuðningsþjónustu samkvæmt reglum þessum er að:

Aðstoða og styrkja einstakling sem þarf aðstæðna sinna vegna á stuðningi að halda við heimilishald, athafnir daglegs lífs og til þess að rjúfa félagslega einangrun.
Efla umsækjanda til sjálfshjálpar og gera honum kleift að búa sem lengst í heimahúsi. Stuðning skal veita með það að leiðarljósi að skapa skilyrði til sjálfstæðs lífs á eigin forsendum, samfélagslegrar þátttöku og miða að valdeflingu og hvatningu.

3. gr.

Réttur til þjónustu.

Umsækjendur þurfa að uppfylla eftirfarandi skilyrði til þess að fá þjónustu skv. reglum þessum:

Eiga lögheimili í Múlaþingi þegar þjónustan hefst.
Búa á eigin heimili eða með foreldrum/ættingjum/forsjáraðilum. Undantekning frá þessu getur verið börn sem dvelja í úrræði á vegum Barna- og fjölskyldustofu.
Þurfa aðstoð vegna skertrar getu, fjölskylduaðstæðna, álags, veikinda eða fötlunar.

Einstaklingar sem búa á hjúkrunarheimilum eða stofnun þar sem greidd eru daggjöld frá ríkinu eiga alla jafna ekki rétt á þjónustu skv. reglum þessum.

Stuðningsþörf er m.a. metin út frá læknisvottorði, SIS-mati, RAI-mati eða öðru mati fagaðila á stöðu umsækjanda. Mat á stuðningsþörf er unnið í samvinnu við umsækjanda og fjölskyldu hans þegar það á við og/eða persónulegan talsmann.

4. gr.

Inntak þjónustunnar.

Stuðningsþjónusta getur verið veitt innan og utan heimilis. Með stuðningsþjónustu er átt við stuðning við heimilishald, athafnir daglegs lífs og/eða félagslegan stuðning til að rjúfa félagslega einangrun og auka möguleika á samfélagslegri þátttöku. Stuðningsþjónusta getur einnig falið í sér ýmsa sérfræðiaðstoð.

Þjónustan getur falið í sér:

Stuðning við heimilishald s.s. þrif á heimili, innkaup, matseld og þvotta. Þjónustan er að jafnaði ekki veitt ef aðrir heimilismenn, 18 ára og eldri, geta sinnt henni. Ekki eru veitt heimilisþrif þar sem rekstur gistiþjónustu er á heimilinu.
Stuðning við athafnir daglegs lífs s.s. persónulega aðhlynningu, hreinlæti, og annað sem varðar athafnir daglegs lífs.
Félagslegan stuðning og rekstur erinda s.s. innkaup og aðdrætti fyrir heimilið.
Heimsendingu matar.
Snjómokstur. Þjónustan er að jafnaði ekki veitt ef aðrir heimilismenn, 18 ára og eldri, geta sinnt henni. Þjónustu er ekki sinnt fyrr en forgangsmokstri er lokið eða samkvæmt ákvörðun verkstjóra þjónustumiðstöðvar.
Garðslátt. Þjónustan er að jafnaði ekki veitt ef aðrir heimilismenn, 18 ára og eldri, geta sinnt henni. Að jafnaði er ekki slegið meira en 300 fm svæði og ekki er veittur sláttur á lögbýlum. Slegið er að hámarki þrisvar á ári.
Öryggisinnlit.
Sérhæfða félagsráðgjöf og ráðgjöf við uppeldi barna.
Stuðning við umönnun og uppeldi barna s.s. vegna fötlunar eða félagslegra erfiðleika foreldra eða barna.
Þjónustu sem veitt er á heimilum fatlaðs fólks í búsetukjörnum og er skilgreind sem sólarhringsþjónusta. Sólarhringsþjónusta er ætluð einstaklingum sem eru 18 ára og eldri og innifelur stuðning við heimilishald, aðstoð við athafnir daglegs lífs og félagslegan stuðning.

Stuðningsþjónusta sem veitt er skv. lögum um félagsþjónustu sveitarfélaga getur numið allt að 15 klst. á viku. Reynist þörf fatlaðs einstaklings fyrir þjónustu eða þörf fyrir stuðning meiri eða sérhæfðari en svo að henni verði fullnægt með almennri stuðningsþjónustu samkvæmt ofangreindum lögum, skal veita aukinn stuðning skv. 3. gr. laga um þjónustu við fatlað fólk með langvarandi stuðn­ings­þarfir.

II. KAFLI

Umsóknir og mat.

5. gr.

Umsókn.

Sótt er um stuðningsþjónustu rafrænt á mínum síðum hjá Múlaþingi eða á umsóknareyðublaði um stuðningsþjónustu.

Með umsókn skulu fylgja nauðsynleg gögn til þess að meta umsóknina s.s.:

Læknisvottorð þegar um heilsubrest er að ræða.
Gilt örorkumat.
Greining á fötlun og/eða umönnunarmat ef umsókn byggir á lögum um þjónustu við fatlað fólk með langvarandi stuðningsþarfir.
Staðfest afrit af nýjasta skattframtali ásamt staðgreiðsluskrá, þegar við á. Heimilt er að kalla árlega eftir skattframtali einstaklings vegna endurmats.

Starfsmenn félagsþjónustu aðstoða umsækjanda við umsóknarferlið ef þörf er á.

6. gr.

Könnun á aðstæðum og mat á stuðningsþörf.

Kanna skal aðstæður umsækjanda svo fljótt sem unnt er eftir að umsókn hefur borist. Sérfræð­ingar félagsþjónustu leggja faglegt mat á aðstæður umsækjanda, byggt á gögnum, heimsóknum og mati.

Uppfylli umsækjandi skilyrði 3. gr. reglna þessara skal leggja mat á stuðningsþörf hans í sam­vinnu við umsækjanda samkvæmt matsviðmiðum í fylgiskjali 1 með reglum þessum.

Við mat á stuðningsþörf er horft til eftirfarandi þátta:

Færni og styrkleika umsækjanda.
Félagslegra aðstæðna umsækjanda og tengslanets.
Samfélagsþátttöku, valdeflingu og virkni umsækjanda.
Þörf umsækjanda fyrir aðstoð og stuðning.
Annars veitts stuðnings.

Leiði mat á stuðningsþörf í ljós að þörf fyrir stuðning og þjónustu er meiri og víðtækari en veitt er skv. lögum um félagsþjónustu sveitarfélaga getur sveitarfélagið óskað eftir því að gert sé mat á stuðningsþörf með SIS-mati.

7. gr.

Samvinna og ráðgjöf.

Við meðferð umsóknar, öflun gagna og upplýsinga sem og ákvarðanatöku skal hafa samvinnu og samráð við umsækjanda eftir því sem unnt er en að öðrum kosti við persónulegan talsmann hans eða umboðsmann ef við á. Leita skal sjónarmiða barna eftir því sem aldur og þroski þeirra leyfir.

Þar sem umsækjandi er með talsmann skal leggja fram samkomulag við hinn fatlaða, sbr. ákvæði 1. mgr. 7. gr. laga um réttindagæslu fyrir fatlað fólk nr. 88/2011. Umboðsmaður skal fram­vísa skriflegu umboði.

Við afgreiðslu umsóknar veitir starfsmaður félagsþjónustu umsækjanda ráðgjöf, upplýsingar og leiðbeiningar um önnur réttindi sem hann kann að eiga, sbr. frumkvæðisreglu og upplýsingaskyldu. Þá upplýsir starfsmaður umsækjanda um þær skyldur sem kunna að hvíla á honum vegna umsóknar um stuðningsþjónustu og aðstoða við öflun nauðsynlegra gagna ef þörf er á.

8. gr.

Afgreiðsla umsókna.

Umsókn ásamt greinargerð starfsmanns félagsþjónustu, er lögð fyrir meðferðarfund félags­þjónustu Múlaþings.

Sé ekki unnt að veita þjónustu strax eða innan þriggja mánaða frá samþykkt umsóknar skal umsókn sett í bið. Umsækjandi skal upplýstur um áætlaðan biðtíma og hvaða þjónusta geti staðið honum til boða á biðtíma sbr. reglugerð nr. 1035/2018 um biðlista, forgangsröðun og úrræði á biðtíma eftir þjónustu.

III. KAFLI

Þjónustusamningur og framkvæmd.

9. gr.

Þjónustusamningur.

Áður en stuðningsþjónusta hefst skal gerður þjónustusamningur milli aðila þar sem fram kemur:

Tilgangur með stuðningi.
Hvernig settum markmiðum þjónustu skuli náð.
Hvernig aðstoðin skuli veitt og tímamörk samnings.

Stuðningur er að jafnaði veittur í tiltekinn fjölda klukkustunda í viku hverri á grundvelli mats á þjónustuþörf. Ef um er að ræða þjónustu í búsetukjarna þá er veitt sólarhringsþjónusta og gerður búsetu-/þjónustusamningur. Þjónustusamningur er að jafnaði endurmetinn árlega með tilliti til breyt­inga á stuðningsþörf.

Að öllu jöfnu skal samþykkt þjónusta ekki gilda lengur en 12 mánuði. Í undantekningartilfellum er heimilt að afgreiða þjónustu til lengri tíma ef ljóst er að umsækjandi hefur þörf á langvarandi stuðningi. Ef umsækjandi óskar eftir áframhaldandi þjónustu skal hann sækja um hana að nýju.

10. gr.

Notendasamningur.

Einstaklingar og fjölskyldur sem hafa leyfi frá Gæða- og eftirlitsstofnun velferðarmála geta sótt um að gera notendasamning, sbr. 28. gr. laga um félagsþjónustu sveitarfélaga nr. 40/1991 eða 10. gr. laga um þjónustu við fatlað fólk með langvarandi stuðningsþarfir nr. 38/2018.

Notendasamningur felur í sér að notandi stjórnar því hver veitir aðstoðina, hvenær hún er veitt og hvernig, þannig að best henti hverjum og einum. Notendasamningar geta verið í formi beingreiðslu­samnings, þar sem notandi sér alfarið um starfsmannahald sjálfur.

11. gr.

Gjaldskrá.

Greitt er fyrir stuðningsþjónustu skv. gildandi gjaldskrá um stuðningsþjónustu hjá félags­þjónustu Múlaþings. Gjald er innheimt fyrir heimsendan mat og heimilisþrif. Að jafnaði er ekki inn­heimt fyrir meira en tvær klukkustundir á viku fyrir heimilisþrif.

Greitt er fyrir snjómokstur skv. gildandi gjaldskrá stuðningsþjónustu Múlaþings og þjónustu­miðstöðva Múlaþings. Þeir sem falla innan þriðja flokks tekjuviðmiða í gjaldskrá Múlaþings fyrir stuðningsþjónustu, eiga ekki rétt á snjómokstri hjá sveitarfélaginu. Undantekningar geta átt við í tilfelli þeirra sem hafa samþykkta ferðaþjónustu, fá heimsendan mat eða njóta heimahjúkrunar.

Greitt er fyrir garðslátt skv. gildandi gjaldskrá stuðningsþjónustu Múlaþings og þjónustu­miðstöðva Múlaþings. Þeir sem falla innan þriðja flokks tekjuviðmiða í gjaldskrá Múlaþings fyrir stuðningsþjónustu, eiga ekki rétt á garðslætti hjá sveitarfélaginu.

Undanþága frá greiðslu fyrir stuðningsþjónustu:

Mögulegt er að sækja um lækkun gjalds og skal það metið sérstaklega af starfsmönnum fjölskyldusviðs eftir tekju- og eignaviðmiðum í gjaldskrá fyrir stuðningsþjónustu í Múla­þingi. Undanþága frá gjaldi gildir ekki fyrir heimsendan mat.
Stuðningsþjónusta sem veitt er í þágu barna er gjaldfrjáls.

12. gr.

Kostnaður og ferðir.

Notandi stuðningsþjónustu greiðir eigin kostnað vegna frístundastarfs sem hann tekur þátt í með stuðningsaðila. Félagsþjónusta Múlaþings endurgreiðir stuðningsaðila útlagðan kostnað að hámarki kr. 7.000 sem er tiltekið í þjónustusamningi.

Ef þjónustunotandi þarf akstursþjónustu, kemur það fram í mati og greinargerð og útfært í þjónustusamningi.

Hvatt er til þess að almenningssamgöngur og einkabíll notanda sé nýttur eins og kostur er. Ef nauðsynlegt er að starfsmaður leggi til eigin bíl er slíkur akstur háður skriflegu samkomulagi milli notanda og starfsmanns og þess getið í þjónustusamningi. Að hámarki er gert ráð fyrir 30 km akstri á mánuði með sveigjanleika á milli mánaða. Þjónustan er háð samþykki meðferðarfundar félags­þjónustu.

13. gr.

Vinnuaðstæður.

Þegar heimili notanda er vinnustaður starfsmanna í stuðningsþjónustu, skulu aðstæður vera í samræmi við lög um aðbúnað, hollustuhætti og öryggi á vinnustöðum nr. 46/1980. Skrifleg áætlun um öryggi og heilbrigði á vinnustað skal liggja fyrir sem byggð er á áhættumati sem nær til allra þátta sem geta haft áhrif á heilsu og öryggi starfsmanna.

IV. KAFLI

Ýmis ákvæði.

14. gr.

Málsmeðferð og málskot.

Um málsmeðferð og málskotsrétt gilda ákvæði stjórnsýslulaga nr. 37/1993 og ákvæði XVI. kafla laga um félagsþjónustu sveitarfélaga nr. 40/1991 og ákvæði VII. kafla laga um þjónustu við fatlað fólk með langvarandi stuðningsþarfir nr. 38/2018.

15. gr.

Varðveisla gagna, trúnaður og aðgangur að gögnum.

Málsgögn er varða persónulega hagi einstaklinga skulu varðveitt með tryggilegum hætti. Hafi starfsmenn kynnst einkahögum umsækjanda eða annarra í starfi sínu er þeim óheimilt að fjalla um þau mál við óviðkomandi nema að fengnu samþykki viðkomandi.

Umsækjandi á rétt á að kynna sér upplýsingar úr skráðum gögnum sem varða mál hans að svo miklu leyti sem það stangast ekki á við trúnað gagnvart öðrum.

Vinnsla mála í teymum sérfræðinga, með málsaðilum er háð upplýstu samþykki málsaðila.

16. gr.

Niðurstaða og rökstuðningur synjunar.

Kynna skal niðurstöðu umsóknar svo fljótt sem unnt er. Sé umsókn hafnað skal umsækjandi fá skriflegt svar þar sem ákvörðun er rökstudd með vísan í viðeigandi ákvæði þessara reglna og þeirra laga er kunna að eiga við.

17. gr.

Áfrýjun.

Telji umsækjandi á rétt sinn hallað skv. reglum þessum er honum heimilt að vísa ákvörðun félagsþjónustunnar til fjölskylduráðs innan fjögurra vikna frá því honum barst vitneskja um ákvörðun. Fjölskylduráð skal fjalla um umsókn og taka ákvörðun um afgreiðslu hennar svo fljótt sem unnt er.

18. gr.

Málskot.

Umsækjandi getur skotið ákvörðun fjölskylduráðs til úrskurðarnefndar velferðarmála. Skal það gert innan þriggja mánaða frá því að umsækjanda barst vitneskja um ákvörðun fjölskylduráðs.

19. gr.

Endurskoðun reglna.

Reglur þessar skulu endurskoðaðar árlega.

20. gr.

Gildistaka.

Reglur þessar taka þegar gildi. Jafnframt falla úr gildi reglur Múlaþings um stuðningsþjónustu, nr. 176/2023.

Reglur þessar voru samþykktar af byggðarráði Múlaþings 25. júní 2024.

Múlaþingi, 1. júlí 2024.

Björn Ingimarsson sveitarstjóri.

Fylgiskjal.
(sjá PDF-skjal)