1. gr.

Almenn heimilisstörf.

Þjónustuþegi greiðir fyrir aðstoð við almenn heimilisstörf. Fullt gjald fyrir stuðningsþjónustu er 2.411 kr. fyrir hvern unninn tíma. Aldrei er þó innheimt fyrir meira en 10 klst. á mánuði. Þjónusta umfram það er gjaldfrjáls.

Mögulegt er að sækja um lækkun gjalds og skal það metið sérstaklega af starfsmönnum fjölskyldu­sviðs samkvæmt viðmiðum í fylgiskjali með gjaldskrá þessari. Afsláttur eða niðurfelling gjalda er metin samkvæmt innsendum tekjuupplýsingum/skattframtali. Kjósi þjónustuþegi af ein­hverjum ástæðum að skila ekki inn tekjuupplýsingum greiðir hann fullt gjald. Undanþága frá gjaldi gildir ekki fyrir heimsendan mat.

Stuðningsþjónusta vegna fatlaðra barna er gjaldfrjáls.

2. gr.

Heimsendur matur.

Þjónustuþegi greiðir fyrir heimsendan mat. Hver skammtur kostar 1.282 kr.

3. gr.

Daggjald í dagvist aldraðra.

Samkvæmt reglugerð um dagdvöl aldraðra, nr. 1245/2016, er upphæð daggjalds 1.579 kr.

4. gr.

Fæðisgjald.

Fæðisgjald í Stólpa, hæfingu/iðju, er 1.282 kr. á dag.

5. gr.

Útlagður kostnaður vegna félagslegs stuðnings.

Notandi stuðningsþjónustu greiðir eigin kostnað vegna frístundastarfs sem hann tekur þátt í með stuðningsaðila. Fjölskyldusvið Múlaþings endurgreiðir stuðningsaðila útlagðan kostnað gegn fram­vísun kvittana, að hámarki 7.000 kr. á mánuði. Sveigjanleiki er varðandi það að nýta fjármagn frá mánuði til mánaðar, þó ekki á milli ára.

6. gr.

Garðsláttur.

Greitt er fyrir garðslátt skv. gjaldskrá þjónustumiðstöðva í Múlaþingi. Umsækjendur sem metnir eru í þörf fyrir stuðningsþjónustu geta átt rétt á allt að þremur gjaldfrjálsum garðsláttum yfir sumarið að uppfylltum skilyrðum eigna- og tekjuviðmiða skv. 1. flokki í fylgiskjali með gjaldskrá þessari. Þeir sem falla undir eigna- og tekjuviðmið skv. 2. flokki í fylgiskjalinu geta átt rétt á 50% afslætti á tímagjaldi gjaldskrár þjónustumiðstöðva Múlaþings. Þeir sem falla innan þriðja flokks eiga ekki rétt á garðslætti hjá sveitarfélaginu.

7. gr.

Snjómokstur.

Greitt er fyrir snjómokstur skv. gjaldskrá þjónustumiðstöðva í Múlaþingi. Umsækjendur sem metnir eru í þörf fyrir stuðningsþjónustu geta átt rétt á snjómokstri. Í undantekningatilfellum er hægt að sækja um gjaldfrjálsan snjómokstur og er þá miðað við eigna- og tekjuviðmið í 1. flokki í fylgiskjali með gjaldskrá þessari. Þeir sem uppfylla eigna- og tekjuviðmið skv. 2. flokki í fylgi­skjalinu geta átt möguleika á 50% afslætti á tímagjaldi gjaldskrár þjónustumiðstöðva Múlaþings. Þeir sem falla innan þriðja flokks eiga ekki rétt á snjómokstri hjá sveitarfélaginu. Undantekningar geta átt við í tilfelli þeirra sem hafa samþykkta ferðaþjónustu eða njóta heimahjúkrunar.

8. gr.

Innheimta.

Gjöld eru innheimt mánaðarlega. Greiðsluseðlar berast ekki heim með pósti nema þess sé sérstak­lega óskað.

9. gr.

Endurskoðun upphæða.

Tímagjald fyrir stuðningsþjónustu tekur breytingum samkvæmt vísitölu neysluverðs sem reiknast frá 1. október ár hvert. Viðmiðunarupphæð tekjumarka tekur breytingum í samræmi við lífeyris­greiðslur almannatrygginga. Viðmiðunarupphæð eignamarka tekur breytingum samkvæmt útgefnu eigna­viðmiði félags- og vinnumarkaðsráðuneytis vegna sérstaks húsnæðisstuðnings. Sjá tekju- og eigna­viðmið í fylgiskjali.

10. gr.

Gildistaka og lagastoð.

Gjaldskrá þessi, sem er sett í samræmi við 26. gr. laga um félagsþjónustu sveitarfélaga nr. 40/1991, öðlast gildi 1. janúar 2025. Um leið fellur úr gildi gjaldskrá fyrir stuðningsþjónustu í Múla­þingi samkvæmt lögum um félagsþjónustu sveitarfélaga nr. 1649/2023.

Samþykkt í sveitarstjórn Múlaþings, 11. desember 2024.

Björn Ingimarsson sveitarstjóri.

Fylgiskjal.
(sjá PDF-skjal)